Магілёў: на ўчастку №72 камісія дае недакладныя звесткі ў пратаколах аб выніках галасавання за дзень
Замест таго, каб даваць звесткі за кожны асобны дзень датэрміновага галасавання, яна кожны раз суміруе дадзеныя аб колькасці прагаласаваўшых з папярэдніх дзён галасавання.
Пра гэта паведамляе партыйны каардынатар назірання Беларускай сацыял-дэмакратычнай партыі (Грамады) Наталія Шкадун.
У выніку гэтага і ўзнікла разыходжанне ў колькасці галасоў, пра якое раней пісаў сайт ПЦ “Вясна”.
Назіральнік кампаніі “Права выбару-2015” Пётр Шкадун 8 кастрычніка паведамляў пра тое, што ў другі дзень галасавання, па яго падліках, прагаласавалі 153 чалавекі, аднак камісія ў пратаколе напісала, што прагаласавала 274. Адсюль і ўзнікла разыходжанне ў яўцы. Калі ж Пётр склаў лічбы за першы і другі дзень датэрміновага галасавання, то выйшаў на лічбу ў 274 чалавекі.
Такім чынам на выбарчым участку №72 у Ленінскім раёне Магілёва яўка не завышаецца – члены камісіі даюць звесткі не за канкрэтны дзень галасавання, а за ўсе дні галасавання разам.
Наталія Шкадун адзначае, што члены участковай выбарчай камісій суміравалі колькасць выбаршчыкаў у пратаколах усе чатыры дні датэрміновага галасавання. Па такой методыцы падліку назіральнік завышэння яўкі не зафіксаваў.
