У Гродне на ўчастку №110 старшыня камісіі перарабіў ранейшы пратакол датэрміновага галасавання
На ўчастку №110 Кастрычніцкага раёну Гродна, які месціцца ў СШ№31, назіральнікі ад кампаніі “Праваабаронцы за свабодныя выбары” выявілі парушэнне выбарчага заканадаўства.
7 кастрычніка да абеду назіральнік Раман Юргель зайшоў на ўчастак№110 і на стэндзе інфармацыі ўбачыў дадзеныя ў пратаколе УВК за 06.10.2015 з агульнай лічбай выданых бюлетэняў - 2500. У той жа дзень пасля 19-й гадзіны вечара іншая назіральніца на гэтым участку Святлана Брывач паведаміла Юргелю, што ў пратаколе за 07.10.2015 старшыня камісіі Юрый Бекіш памяняў лічбы колькасці атрыманых бюлетэняў. Новая лічба, якая фігуруе ў пратаколах – 2400. Быў зменены і ранейшы пратакол за 06.10.2015 са зменай і іншых лічбаў.
Назіральнікі лічаць такія дзеянні старшыні камісіі грубым парушэннем выбарчага заканадаўства. Раман Юргель накіраваў адпаведныя заявы ў ТВК Кастрычніцкага раёна Гродна і ў ЦВК.
