Магілёў: “Малайцы, рабяты, нават з куратарам прыйшлі!”
У Магілёве назіральнікі фіксуюць галасаванне пад прымусам. Рэкардсменам з’яўляецца выбарчы ўчастак №42, які размешчаны ў Ленінскім раёне горада ў гімназіі №3.
Са словаў назіральніцы Надзеі Шкадун, на тэрыторыі выбарчага ўчастка размяшчаюцца інтэрнат медыцынскага каледжа, інтэрнат Магілёўскага дзяржаўнага ўніверсітэта імя А.Куляшова, а таксама інтэрнат каледжа мастацтваў.
- Сёння быў заўважаны наплыў студэнтаў, якія прыходзілі на выбарчы ўчастак па 4-5 чалавек. Каля 60 чалавек было з інтэрната медкаледжа, - распавядае назіральніца.
Са слоў Надзеі Шкадун, усяго за другі дзень на выбарчым участку прагаласавалі 172 чалавекі, з якіх больш 70% складаюць студэнты. Па афіцыйных жа звестках, за гэты дзень на выбарчым участку прагаласавалі 162 чалавекі.
Назіральнік Алесь Буракоў з выбарчага ўчастка №4, які размешчаны ў Ленінскім раёне Магілёва ў памяшканні Магілёўскага дзяржаўнага політэхнічнага каледжа таксама сведчыць пра тое, што ў другі дзень датэрміновага галасавання актывізаваліся навучэнцы каледжа.
- За другі дзень на ўчастку прагаласавала 86 чалавек, 80% з якіх студэнты, якія пражываюць у інтэрнаце. Быў выпадак, калі намесніца старшыні камісіі пахваліла прыйшоўшых на ўчастак маладых выбаршчыкаў, маўляў, малайцы, рабяты, нават з куратарам прыйшлі! - Распавядае назіральнік.
Алесь Буракоў кажа, што такімі тэмпамі датэрміновае галасаванне на яго выбарчым участку складзе каля 50%.
Найбольшае разыходжанне ў яўцы зафіксаваў назіральнік ад Беларускай сацыял-дэмакратычнай партыі (Грамады) Пётр Шкадун на выбарчым участку №72, які размешчаны ў Ленінскім раёне горада. Паводле яго дадзеных, у другі дзень галасавання прагаласавал 153 чалавекі, па звестках членаў участковай выбарчай камісіі – 274.
