Назіральнік ад Руху «За Свабоду» пазбаўлены акрэдытацыі
Назіральнік ад Руху «За Свабоду» ад кампаніі «Права выбару» Пётр Маркелаў пазбаўлены акрэдытацыі. Ён назіраў за хадой галасавання на выбарчым участку №10 Першамайскага раёна Мінска ў межах моладзевай ініцыятывы «87%». Арганізаваная анлайн-трансляцыя, але яе працяг - пад пытаннем, бо чальцы выбарчай камісіі забаранілі карыстацца электрычнасцю.
«У абед участковая выбарчая камісія правяла паседжанне, на якім пазбавіла мяне акрэдытацыі», - распавёў прэс-службе «Права выбару» Пётр Маркелаў.
Па ягоных словах, на яго былі пададзеныя 8 скаргаў – ад праўладных назіральнікаў, сябраў камісіі – па абсалютна розных надуманых прычынах. «Я хацеў сфатаграфаваць паперы, але старшыня камісіі не дазволіў», - патлумачыў назіральнік.
Маркелаў плануе застацца назіраць, бо на гэты момант назіральнікаў “Права выбару” адсадзілі з пакоя на месцы ў калідоры.
Яны рыхтуюць скаргу на рашэнне камісіі пра пазбаўленне акрэдытацыі. Акрамя таго, рыхтуюцца яшчэ дзве скаргі па парушэннях на гэтым участку – пра неапячатванне пакою са скрыняй для галасавання і знаходжанне невядомых асобаў на выбарчым участку.
«Сёння толькі другі дзень датэрміновага галасавання, - пракаментаваў пазбаўленне акрэдытацыі назіральніка ад Руху першы намеснік старшыні арганізацыі Юрась Губарэвіч. - Мы прагназуем павелічэнне фактаў падобных інцыдэнтаў у суботу-нядзелю».
Па ягоных словах, з досведу мінулых гадоў выбарчым камісіям назіральнікі на ўчастках не патрэбныя, бо могуць засведчыць парушэнні. «Відавочна, што на гэтых выбарах гэта паўтараецца», - заключыў Губарэвіч.
