На “Магілёўхімвалакно” рабочым прапануюць прагаласаваць датэрмінова
У якасці бонуса ў любы працоўны дзень датэрміновага галасавання начальства абяцае адпускаць работнікаў дамоў адразу пасля абеду. Пра такі стымул для галасавання паведаміў адзін з работнікаў прадпрыемства.
- Нас праінфармавала начальства, што любы з нас можа прагаласаваць датэрмінова, і ў якасці бонуса і стымулу прыйсці на ўчастак для галасавання работнікаў абяцалі адпускаць з працы адразу пасля абеду. У нашым аддзеле такую прапанову ўспрынялі неадназначна, бо большасць людзей ведае, што такое датэрміновае галасаванне, і як там могуць быць падтасаваны бюлетэні, - кажа работнік “Магілёўхімвалакно” Пётр.
Мужчына адзначае, што ў іншых аддзелах работнікі ўспрынялі падобную прапанову па-рознаму – некаторыя збіраюцца ёй скарыстацца, а іншыя гатовы галасаваць выключна ў дзень выбараў.
Нагадаем, што датэрміновае галасаванне на выбарах прэзідэнта Рэспублікі Беларусь пачынаецца 6 кастрычніка і працягнецца да 10 чысла. 11 кастрычніка з’яўляюцца асноўным днём галасавання.
