Бабруйск: цішыня падчас агітацыі
Вонкава ў Бабруйску выбарчая кампанія мала заўважная. На адмінстрацыйных будынках, крамах, будынках навучальных устаноў, інтэрнатах, як і раней, размешчаны толькі інфармацыйныя плакаты "Выбары-2015".
Мясцовыя СМІ таксама мала распавядаюць пра кандыдатаў, не публікуюць праграмы. Яны абмяжоўваюцца агульнарэспубліканскай інфармацыяй, датычнай выбараў.
Напрыклад, газета гарвыканкаму спачатку вельмі бадзёра і часта пісала пра выбарчую кампанію ў Бабруйску, нават завяла асобную рубрыку. http://bobrlife.by/vybory Але хутка цікавасць да выбараў заціхла, і рэдакцыя таксама перайшла на перадрукоўку рэспубліканскіх навін.
-Мы толькі на днях атрымалі друкаваную прадукцыю, - распавядае Алена Мядзведзева, мясцовы кіраўнік штабу Таццяны Караткевіч. - Будзем узгадняць з уладамі месца правядзення сустрэчы нашай кандыдаткі з выбаршчыкамі, і тады ўжо расклеім матэрыялы ў горадзе. Не ведаю, якія праблемы ў нашых супернікаў, бо іх агітацыйных матэрыялаў я таксама нідзе не бачыла.
Вядома, што за перыяд агітацыі ў Бабруйску прайшла толькі адна сустрэча з выбаршчыкамі. Яе правяла давераная асоба Лукашэнкі, міністр працы і сацыяльнай абароны Марыяна Шчоткіна.
