Выбарчая тэматыка ў інфармацыйнай прасторы Салігоршчыны адсутнічае
Салігорскія праваабаронцы з Беларускага Хельсінкскага Камітэту фіксуюць надзвычай нізкую ўвагу рэгіянальных сродкаў масавай інфармацыі да сёлетняй кампаніі па выбарах прэзідэнта краіны.
Агляд мясцовых СМІ за апошнія два месяцы паказвае, што ад актыўнага асвятлення выбараў ухіляюцца не толькі дзяржаўныя ды кантраляваныя ўладамі прыватныя выданні, але і нешматлікія незалежныя медыярэсурсы. Найбольшую актыўнасць на перадвырачай ніве паказваў незалежны сайт Салігорск.інфа. Зрэшты, усе тэматычныя матэрыялы на ім тычыліся выключна пытанняў празрыстасці і справядлівасці выбарчага працэсу. Інфармацыі ж аб патэнцыйных кандыдатах і іх актыўнасці ў рэгіёне ні на гэтым сайце, ні на старонках іншых выданняў не было.
Найбольшыя прэтэнзіі, аднак, праваабаронцы выстаўляюць дзяржаўным СМІ:
-- Як бы ні было, прыватныя выднні ці сайты могуць фармаваць інфармацыйную палітыку на ўласны густ. Хаця гэткая палітыка фактычнага ігнору з іх боку сама па сабе ўжо шмат кажа пра нашыя выбары. А вось дзяржаўныя медыя ўсё ж маюць наўпроставы абавязак па ўсебаковым і аб’ектўыным асвятленні гэтай важнейшай падзеі. Бо як грамадзяне могуць зрабіць узважаны і свабодны выбар, калі іх не інфармуюць аб наяўнасці альтэрнатывы дзеючаму кіраўніку краіны, - кажа рэгіянальны назіральнік ад БХК Леанід Мархотка.
Праваабаронца таксама адзначае катэгарычнае нежаданне дзяржаўных медыяў адлюстроўваць на старонках сваіх рэсурсаў меркаванне незалежных назіральнікаў аб ходзе выбарчай кампаніі.
