У Магілёве вызначылі месцы для агітацыі
7-га верасня адбыліся пасяджэнні Ленінскай і Кастрычніцкай тэрытарыяльных выбарчых камісій на якіх быў узгоднены пералік месцаў, дзе дазваляецца правядзенне масавых мерапрыемстваў, сходаў па-за памяшканнямі і пікетавання, якія арганізоўваюцца кандыдатамі ў прэзідэнты Рэспублікі Беларусь.
Са слоў праваабаронцы Барыса Бухеля, істотнага прагрэсу ў гэтым пытанні ў параўнанні з мінулымі выбарамі не назіраецца.
- З новага магу адзначыць, што цяпер дазволена агітацыя каля гіпермаркета “Гіпа” і гандлёвага цэнтра “Атлас” у Кастрычніцкім раёне Магілёва. Пляцоўка каля крамы “Рублевский” выкарыстоўвацца для агітацыі больш не будзе. Усе астатнія месцы – фактычна засталіся з мінулых выбараў. Праводзючы аналіз, магу сказаць адразу, што цэнтр горада фактычна выпадае з агітацыі, - гаворыць Барыс Бухель.
Нагадаем, што Кастрычніцкім раёне Магілёве дазволена правядзенне масавых мерапрыемстваў падчас выбараў прэзідэнта каля “Абласнога цэнтру алімпійскага рэзерву па хакеі з шайбай”, пляцоўкі перад ГЦ “Прэстан”, ГЦ “Гіпа”, ГЦ “Славянскі”, крамы №4 “Задняпроўе”, ГЦ “Прэзент”, ГЦ “Атлас”, на спартыўнай пляцоўцы каля СШ№13, пляцоўцы каля ТАА “Кантынент НВ”, унутрыдваравых пляцоўках па пр-ту Пушкінскаму, 63 і вул. Чалюскінцаў, 146.
У Ленінскім раёне Магілёва агітаваць можна каля Цэнтра культуры вольнага часу чыгуначнікаў, у скверы “40 год Перамогі”, каля ГЦ “Крыніца”, спарткомплексу “Алімпіец”, дому культуры ПУП “Метыз”, УА “Цэнтр пазашкольнай працы ўпраўлення адукацыі Магілёўскага аблвыканкама”, а таксама на пляцоўках па вул. Будаўнікоў, 12, вул. Ямніцкай, 81, вул. прафсаюзнай, 21, Магілёўскага сацыяльнага дому для ветэранаў, састарэлых і інвалідаў.
