Гомельская абласная камісія: “У назіральніка няма падстаў не давяраць раённай камісіі”
Гомельская абласная выбарчая камісія 7 верасня на паседжанні разгледзела скаргу назіральніка з Мазыра Уладзіміра Целяпуна і не задаволіла яе. Назіральнік паскардзіўся ў абласную камісію на адсутнасць галоснасці і адкрытасці працы Мазырскай раённай выбарчай камісіі. Заяўнік прасіў РВК азнаёміць яго з падпіснымі лістамі за вылучэнне кандыдатамі ў прэзідэнты Сяргея Гайдукевіча і Мікалая Улаховіча, але яму гэта не было дазволена. Уладзімір Целяпун сумняваўся ў праўдзівасці подпісаў за дадзеных патэнцыйных кандыдатаў, таму што не заўважыў, каб у горадзе недзе за іх збіралі подпісы.
7 верасня на паседжанні абласной камісіі прысутнічаў назіральнік Віктар Адзіночанка. На паседжанні прызналі, што ў працы Мазырскай РВК былі нязначныя фармальныя парушэнні – рашэнне па скарзе назіральніка прымалася не калегіяльна. Але па сутнасці задаволіць скаргу і даць назіральніку магчымасць азнаёміцца з подпісамі абласная камісія адмовіла.
На паседжанні выступаў старшыня Мазырскай РВК Ігар Баранаў. Ён сцвярджаў, што камісія дзейнічала ў адпаведнасці з заканадаўствам, подпісы за дадзеных патэнцыйных кандыдатаў правяралі члены РВК. «Цікавая акалічнасць – старшыня РВК спасылаўся, што камісія дзейнічала ў адпаведнасці з «Дапаможнікам па правядзенню выбараў у прэзідэнты», выдадзеным ЦВК. То бок спасылаўся не на Выбарчы кодэкс, а на Дапаможнік», - адзначыў назіральнік.
На паседжанні выступала намесніца старшыні абласной камісіі Тамара Лук'яненка, якая 4 верасня выязджала разбірацца са скаргай назіральніка ў Мазыр. «Па яе словах, яна доўга размаўляла з Уладзімірам Целяпуном пры сустрэчы ў Мазыры, даводзіла яму, што ўсім разам, усім грамадзянам трэба працаваць на імідж Беларусі, асабліва ў сучасных складаных умовах, улічваць эканамічны стан і міжнароднае становішча. Таксама яна гаварыла, што ў назіральніка няма падстаў не давяраць раённай камісіі», - дадаў Віктар Адзіночанка.
