Кіраўніка ініцыятыўнай групы Анатоля Лябедзькі папрасілі не парушаць заканадаўства
Мінская гарадская выбарчая камісія папрасіла кіраўніка ініцыятыўнай групы Анатоля Лябедзькі Віктара Карнеенку не распаўсюджваць агітацыйную інфармацыю і трымацца закона, на што атрымала ад яго адмову і прапанову мяняць недасканалае заканадаўства.
На сёнешнім паседжанні гарадской выбарчай камісіі разглядалася пытанне распаўсюду ініцыятыўнай групай прэтэндэнта ў прэзідэнты Анатоля Лябедзькі агітацыйнай інфармацыі падчас збору подпісаў. Ніякіх юрыдычных наступстваў з боку камісіі не сталася – толькі просьба больш так не рабіць.
Кіраўнік штабу прызнаў факт распаўсюду падчас пікетаў інфармацыі пра дзейнасць АГП, яе прапановы і мэты, а таксама біяграфічных звестак пра старшыню партыі і адмовіўся выканаць просьбу камісіі, дадаўшы, што ініцыятыўныя групы кандыдата Лябедзькі працягнуць рабіць гэта і пасля выбараў.
– Мы не юлілі, прызналі факт распаўсюду, сваю пазіцыю шчыра растлумачылі і параілі гарадской камісіі змяніць заканадаўства, якое недасканальнае. Збор подпісаў – гэта таксама агітацыйны перыяд, чаму падчас яго агітацыя забаронена? Калі ў законе ёсць кепскія нормы, іх трэба выпраўляць. Мы лічым няправільным, калі падчас выбарчай кампаніі на экране бачны толькі адзін твар, і будзем прапагандаваць нашага кандыдата. Мне падаецца, што камісія – гэта не орган, які праводзіць выбары, а сродак, які дапамагае не змяніцца кіраўніцтву краіны, – адзначыў Віктар Карнеенка.
