Адміністрацыя магілёўскага завода “Зеніт” абяцае кантраляваць галасаванне работнікаў
Прадстаўнікі адміністрацыі забаранілі рабочым падпісвацца ў падтрымку іншых прэтэндэнтаў у прэзідэнты, акрамя Аляксандра Лукашэнкі, а таксама настойваюць, каб галасавалі выключна за яго. Як яны будуць кантраляваць галасы выбаршчыкаў – інфармацыя не раскрываецца.
Пра гэта члену інціцыятыўнай групы прэтэндэнта ў прэзідэнты Таццяны Караткевіч Аляксею Паўлоўскаму паведамілі рабочыя завода.
- Мне паведамілі рабочыя завода, што адміністрацыя прадпрыемства будзе адсочваць, хто як галасуе і забаранілі галасаваць за іншых кандыдатаў. Кіраўніцтва завода паведаміла рабочым, што ўсе яны будуць працаваць у складзе ўчастковых выбарчых камісій і таксама будуць адсочваць не толькі яўку сваіх супрацоўнікаў, аднак хто з іх як прагаласаваў - кажа Аляксей Паўлоўскі.
Зборшчык подпісаў кажа, што дагэтуль нічога падобнага ён ад выбаршчыкаў не чуў. Паўлоўскі адзначае, што атрымліваецца, што склад участковых выбарчых камісій ужо вядомы і зацверджаны.
У сувязі з гэтым Аляксей Паўлоўскі накіраваў заявы ў пракуратуру Магілёва, а таксама ў Магілёўскі гарадскі Савет дэпутатаў. Ён патрабуе прыцягнуць да адказнасці адміністрацыю завода “Зеніт” за злоўжыванне службовым становішчам, а таксама адклікаць подпісы, сабраныя пад ціскам адміністрацыяй гэтага завода за Аляксандра Лукашэнку.
