У Брэсцкім раёне падчас пікетаў за вылучэнне Аляксандра Лукашэнкі адмыслова ладзяць канцэрты творчых калектываў
Пра гэта распавядаецца ў нататцы “Подпіс – яшчэ не голас, але пазіцыя ўжо бачна”, змешчанай у дзяржаўнай раённай газетай “Зара над Бугам”.
Публікацыя прысвечана збору подпісаў за вылучэнне кандыдатаў у прэзідэнты Беларусі, і ў ёй сцвярджаецца, што “мясцовыя ўлады прынялі ўсе неабходныя захады, каб гэтая кампанія адбывалася ў максімальна ліберальных умовах”.
Але фактычна нататка ўтрымлівае звесткі толькі пра пікеты, якія ладзяцца ў падтрымку дзеючага кіраўніка дзяржавы. У газеце гаворыцца пра тое, што актыўны удзел у выбарчай кампаніі з першых дзён бяруць мясцовыя прадстаўнікі РГА “Белая Русь”, а далей падрабязна распавядецца пра пікет у вёсцы Тэльмы.
Журналіст дзяржаўнай “раёнкі” не хавае, што вялікай цікавасці да самога працэсу збору подпісаў у вяскоўцаў няма, аднак яны прыйшлі паслухаць папулярныя песні ў выкананні самадзейных артыстаў і творчых калектываў мясцовага Дома культуры. З публікацыі высвятляецца, што канцэрт быў адмыслова зладжаны ў той час, калі быў арганізаваны пікет у падтрымку Аляксандра Лукашэнкі.
