У Брэсце адбыўся пікет салідарнасці з палітычнымі вязнямі
Акцыя была праведзена сябрамі ініцыятыўнай групы па вылучэнні кандыдатам у прэзідэнты Сяргея Калякіна, а таксама актывістамі незалежнага прафсаюза працоўных радыёэлектроннай прамысловасці.
Удзельнікі пікету былі апранутыя ў цішоткі з надпісам “Свабоду Мікалаю Статкевічу” і распядалі жыхарам горада пра лёс палітычных зняволеных у Беларусі. Паводле актывістаў, звычайным людзям не хапае інфармацыі, пра тое, што ў краіне адбываецца пераслед асобаў, якія з’яўляюцца апанентамі цяперашняй улады.
“Шмат у каго пануе страх: грамадзяне не асмельваюцца адкрыта выказваць свой пункт гледжання на сітуацыю ў Беларусі, - распавяла адна з удзельніц пікету. – Але ж у тым, каб агучыць сваё меркаванне і патрабаваць выканання ўладамі сваіх абавязкаў, няма нічога крымінальнага і супрацьзаконнага”. Акцыя прайшла без інцыдэнтаў.
