Грамадзяне накіравалі пасланне беларускага народу прэзідэнту і парламентарыям
29 красавіка група грамадзянаў з розных рэгіёнаў Беларусі накіравала пасланне ў адрас прэзідэнта і Нацыянальнага сходу Рэспублікі Беларусь з заклікам "не на словах, а на справах паказаць сваю сумленнасць і справядлівасць".
Пра гэта Праваабарончаму цэнтру «Вясна» паведаміла прадстаўнік гэтай групы Людміла Кучура, адзначыўшы, што пад пасланнем падпісаліся 37 чалавек - з Мінска, Гомеля, Жлобіна, Светлагорска, Салігорска, Барысава, Маладзечна, Оршы, Наваполацка, Брэста, Пружанаў, Ліды, Магілёва.
Тэкст звароту:
Пасланне беларускага народа Прэзідэнту Рэспублікі Беларусь і Нацыянальнаму сходу Рэспублікі Беларусь
У 2015 годзе будуць чарговыя выбары Прэзідэнта Рэспублікі Беларусь і пяты тэрмін Вашага прэзідэнцтва. Перад кожнымі выбарамі Вы звяртаецеся да народа і Нацыянальнага сходу са сваёй «праграмнай» прамовай, распавядаючы не пра цяжкасці і недахопы ў краіне, якія неабходна пераадолець, а пра міфічную «светлую будучыню», якая нас чакае ад Вашай палітыкі.
Узгадаваная за 20 гадоў Вашага кіравання сістэма працуе не для народа. Мы ў поўнай меры адчулі абыякавасць, злачынную халатнасць і нават злоўжыванне сваімі абавязкамі ў дачыненні да нашых праблемаў менавіта з боку тых, хто АБАВЯЗАНЫ абараняць і выконваць ЗАКОН - супрацоўнікаў судоў і пракуратуры, Следчага камітэта і МУС.
За апошнія 9 гадоў мы калектыўна звярталіся да Вас больш за 40 разоў (!!!) з просьбай аднавіць справядлівасць па нашых грамадзянскіх справах і крымінальных справах нашых блізкіх. А таксама аб асабістым прыёме нас, грамадзянаў. Але Вам няма калі ўнікаць у гэтыя праблемы. Больш за тое - каб гэты «народзец» не дакучаў сваімі скаргамі, вырашылі ўвесці закон аб адказнасці грамадзянаў за напісанне паўторных скаргаў. І гэта замест таго, каб увесці закон аб адказнасці чыноўнікаў за адмову ад разгляду скаргаў і заяў грамадзянаў па сутнасці, за адпіскі. Але ж скаргі нашыя ўсе абгрунтаваныя, і ўсе довады і доказы мы пацвярджаем матэрыяламі нашых спраў.
Менавіта яны - чыноўнікі - з'яўляюцца найвялікшым злом у нашай краіне, а таксама Вашай вялікай праблемай, але Вы не жадаеце гэта прызнаваць. Тое беззаконне, якое яны чыняць, для іх стала нормай. Таму ў дадзеных структурах і квітнее карупцыя і, як следства, - фальсіфікацыя спраў.
Інфармацыя аб карупцыі сярод суддзяў і пракурораў, супрацоўнікаў міліцыі, Следчага камітэта, Міністэрства юстыцыі стала штодзённым на навінавых стужках і вось прыклады: пракурор Мінскай вобласці Міхаіл Снягір; намеснік генеральнага пракурора Аляксандр Архіпаў; намеснік старшыні суда Кастрычніцкага р-на г. Магілёва Магамед Умараў; намеснік старшыні суда Савецкага р-на г. Гомеля Юрый Жораў; намеснік старшыні Беларускага ваеннага суда Юрый Тузаў, намеснік міністра МУС Полудзень Е., падпалкоўнік УБАЗ і К МУС РБ па г. Мінску Саковіч А., супрацоўнікі СК РБ падпалкоўнік юстыцыі Мацкевіч Д., капітаны юстыцыі Контусь Д. і Супинский Г. і іншыя. Гэта далёка не поўны пералік, бо ў дачыненні да яшчэ шэрагу службовых асобаў органаў следства, пракуратуры, суда распачатыя крымінальныя справы і вядзецца следства. Усе яны на працягу многіх гадоў зламалі лёсы не адной сотні нявінных грамадзянаў. Што рабіць цяпер ім? Радавацца адбыўшамуся правасуддзю над сваімі кАтамі?
Але ж менавіта Вы прызначалі і зацвярджалі на высокія пасады гэтых людзей! Як і тых суддзяў і пракурораў, якія маюць дачыненне да фальсіфікацыі, а затым вынясення незаконных рашэнняў па нашых крымінальных і грамадзянскіх справах.
У 2010 г. перад чарговымі выбарамі, каб мы - група грамадзянаў, якія змагаюцца за свае правы, асабліва не актыўнічалі, Вамі было дадзена ўказанне кіраўніку Адміністрацыі Прэзідэнта прыняць некаторых нашых прадстаўнікоў. Пасля гэтай сустрэчы было абяцана разгледзець нашыя справы міжведамаснай камісіяй пры Адміністрацыі Прэзідэнта. Па некаторых з іх ёсць заключэнні міжведамаснай камісіі, Аператыўна-аналітычнага цэнтра, Следчага камітэта Рэспублікі Беларусь, Генеральнага пракурора. Хоць у справах знойдзеныя грубыя парушэнні заканадаўства, усё засталося па-ранейшаму.
Нягледзячы на гучныя выпадкі выкрыцця і суды над карупцыянерамі суддзямі і пракурорамі, на сваіх пасадах застаецца дагэтуль усё кіраўніцтва Вярхоўнага Суда, Генеральнай пракуратуры, Следчага камітэта. Іх знаходжанне на сваіх пасадах кажа пра тое, што ў іх і ў Вас ёсць што хаваць ад народа. Бо справы, якія распачыналіся пракурорамі-злачынцамі, і рашэнні, якія выносяцца суддзямі-карупцыянерамі, так і засталіся неперагледжанымі.
Мы патрабуем стварэння камісіі па пераглядзе грамадзянскіх і крымінальных спраў нашых і нашых блізкіх, бо ўсе гэтыя справы фальсіфікаваныя. А вынікі працы гэтай камісіі павінны быць прынятыя да пачатку выбараў Прэзідэнта Рэспублікі Беларусь.
І замест таго, каб штогод рабіць пасланне, якое з году ў год нічым не адрозніваецца ад папярэдняга, лепш бы Вы не на словах, а на справе паказалі сваю сумленнасць і справядлівасць.
29 красавіка 2015 года
